«Մեր սպառողները շատ պարտաճանաչ են»
Հարցազրույց «ՀայՌուսգազարդ» ՓԲԸ իրացման գծով փոխտնօրեն Ռուբեն Սուրենյանի հետ
—Պարոն Սուրենյան, անցյալ տարի բնական գազի ներկրման ծավալների ավելացումը ենթադրում է նաեւ սպառման ծավալների աճ: Այս առումով ինչ ցուցանիշներ է արձանագրել Ընկերությունը:
—Այո, վերջին մի քանի տարիների ընթացքում մենք արձանագրում ենք սպառման ծավալների կայուն աճ, ինչը պայմանավորված է թե բաժանորդների թվաքանակի, թե գազաֆիկացված տարածքներում կենցաղ-սպասարկման ծառայություններ մատուցող կազմակերպությունների ավելացմամբ, ինչու չէ նաև մեկ բաժանորդի կողմից միջին տարեկան սպառման ծավալի աճով: 2006թ.-ին նախորդ տարվա համեմատ սպառման ծավալն ավելացել է 4.6 տոկոսով:
—Եթե կարելի է մանրամասնեք կոնկրետ ոլորտներով:
—Կոնկրետ ոլորտներով հետաքրքիր պատկեր ունենք, օրինակ բնակչությունը 2005թ.-ի համեմատ ավել է սպառել 29.4 տոկոս, բյուջետային կազմակերպությունները` 17.4 տոկոս, տարբեր սպառողների մոտ աճը կազմել է 22 տոկոս, ավելի քան 47 տոկոսով ավելացել է ավտոգազալիցքավորման կայանների կողմից սպառման ծավալը: Դրան հակառակ սպառման ծավալը 17.5 տոկոսով նվազել է էներգետիկայի բնագավառում: Անցյալ տարի արդյունաբերությունը նույնպես 2.14 մլն խորանարդ մետրով քիչ է սպառել: Այդուհանդերձ, արդյունքում, ինչպես արդեն նշեցի, մենք ունենք 4.6 տոկոս սպառման ծավալների աճ:
—Սպառման կառուցվածքում որ ոլորտներն են խոշոր սպառողները:
—Եթե դասակարգելու լինենք առաջին եռյակը, ապա ամենախոշոր սպառողը էներգետիկան է` մոտ 511 մլն խ.մ, երկրորդը բնակչությունն է` 401.6 մլն խ.մ, այնուհետև արդյունաբերությունը` 345.5 մլն խ.մ:
—Պարոն Սուրենյան, գանձումների հետ կապված վիճակը ինչպիսին է:
—Գանձումների հետ կապված տևական ժամանակ ապահովում ենք կայուն բարձր մակարդակ: Անցյալ տարի համակարգում գանձումները կազմել են 101, 3 տոկոս:
—Կան չվճարող սպառողներ:
—Ոչ, մեր սպառողները շատ պարտաճանաչ են այդ հարցում, ճիշտ է, կան առանձին սպառողներ, որոնք երբեմն խնդիրներ են հարուցում գանձումների հետ կապված,ինչը սակայն այնքան չնչին տոկոս է կազմում,որ որևէ ձևով չի անդրադառնում ընդհանուր արդյունքի վրա: Բնակչության մասով շեշտեմ, որ կայուն գանձումներ ենք ապահովում:
Հասարակայնության և զանգվածային լրատվության միջոցների հետ կապերի ծառայություն
Կոնտակտային տվյալներ ԶԼՄ-ների համար՝
(+374 10) 29-47-60
(+374 10) 29-49-36