Արարատ — Երևան գազատարի վրա աշխատանքներում կիրառվում է նախադեպը չունեցող տեխնոլոգիա

«ՀայՌուսգազարդ» ընկերությունը «ՏԵԽՆՈ ՖԻՏ» ընկերության հետ համատեղ իրականացնում են գործող Երեւան-Արարատ գազատարի՝ կորոզիայի ենթարկված խողովակաշարի վերականգնողական աշխատանքները։ Նախադեպը չունեցող այս ծրագիրը, որի իրականացման համար օգտագործվում են նորագույն տեխնոլոգիաներ, թույլ է տալիս կատարել վերանորոգման աշխատանքները գազատարի գազազրկման նվազագույն ժամկետներով։ Հետագայում վերանորոգված հատվածը ծառայելու Է Իրան- Հայաստան գազատարի շահագործման համար։

Երևան-Արարատ գազատար

Երևան-Արարատ գազատար

Վերանորոգման աշխատանքներն իրականացվում Արարատ-Երեւան 40կմ երկարությամբ գազատարի 10կմ-անոց հատվածում:
«ՀայՌուսգազարդ»-ի գլխավոր տնօրենի տեղակալ, գլխավոր ճարտարագետ Աշոտ Հովսեփյանի տեղեկացմամբ, «ժամանակի ազդեցությամբ պայմանավորված, գազատարի որոշ հատվածներում թույլատրելի ճնշման մակարդակը նվազել է՝ հասնելով 15–16 մթնոլորտի։ Եթե այս վիճակով շահագործենք գազատարը, ապա առավելագույնը Իրանից կարող ենք փոխադրել միայն պայմանագրային քանակությամբ գազ։ Սակայն մեր առջեւ խնդիր ենք դրել գազատարի (Արարատ-Երեւան հատվածի) հզորությունը բարձրացնել այն աստիճան, որ հարկ եղած դեպքում կարողանանք փոխադրել ավելի շատ, քան պայմանագրով նախատեսված է, օրինակ 7–8 մինչեւ 9 մլն խ.մ գազ, եւ այս քանակը պահեստարանի գազի հետ միասին կապահովվի երկրի էներգետիկ անկախությունը:»

Ըստ նրա, գազատարի այս վերականգնման աշխատանքները կտրուկ տարբերվում են նախկինում իրականացված տեխնոլոգիաներից, եւ նրանք հնարավորություն կտան գազատարը դարձնել մինչեւ 40 մթնոլորտ ճնշման համար պիտանի։

«ՏԵԽՆՈ ՖԻՏ» ընկերության գլխավոր տնօրեն Դավիթ Չիտչյանի խոսքերով, «մեր կիրառած նորագույն տեխնոլոգիան նախադեպը չունի տարածաշրջանում: Մենք կիրառում ենք այնպիսի տեխնոլոգիաներ, որ ավանդական բոլոր տեխնոլոգիաներից նախընտրելի է երեք առումով. աշխատանքների գերակշռող մասը կատարում ենք առանց գազազրկման, ավելի արագ ու մատչելի գներով:» «Մենք կարծում ենք, որ սա հանդիսանում է լավագույն պատասխանը համաշխարհային տնտեսական ճգնաժամին:Այսօր մենք ոչ միայն կարող ենք, այլ նաև պարտավոր ենք կառուցել ավելի արագ, ավելի էժան և ավելի որակով։ Եվ դա հնարավոր է նոր տեխնոլոգիաների շնորհիվ,» — ասաց Դ. Չիտչյանը:

Հասարակայնության և զանգվածային լրատվության միջոցների հետ կապերի ծառայություն

Կոնտակտային տվյալներ ԶԼՄ-ների համար՝

(+374 10) 29-47-60

(+374 10) 29-49-36

press@gazpromarmenia.am