Անցկացվել են համալիր հակավթարային վարժանքներ

Մարտի 15-ին «Գազպրոմ Արմենիա» ՓԲԸ-ի դուստր ընկերության՝ «Տրանսգազ» ՍՊԸ-ի բոլոր հինգ գծային շահագործման մասնաճյուղերում (ԳՇՄ) անցկացվել են համալիր հակավթարային վարժանքներ:


Վարժանքների ընթացքում կատարվել են մայրուղային գազատարների գծային հատվածներում գարնանային վարարումներով պայմանավորված հնարավոր վթարների վերացմանն ուղղված գործողություններ։

Վանաձորի ԳՇՄ-ում, ի տարբերություն մյուս 4 մասնաճյուղերի, որտեղ վարժանքներն անցկացվել են առանց վթարային խմբի մեկնումի, կազմակերպվել է ընդհանուր հավաք և վթարային խմբի մեկնում ենթադրյալ դեպքի վայր։

«Մայրուղային գազատարի օդային անցման հենասյան ողողում» թեմայով վարժանքի սցենարով հեղեղաջրերով ողողվել է Վանաձոր-Գյումրի 700 մմ տրամագծով մայրուղային գազատարի օդային անցման հենասյունը:

Վանաձորի ԳՇՄ-ի վթարային խումբը տեղում իրականացրել է գործողություններ՝ մայրուղային գազատարի գծային հատվածում առաջացած ենթադրյալ վթարի վերացման նպատակով:


Աշխատանքները պատշաճ մակարդակով կատարելու համար վարժանքի մասնակիցները ապահովված են եղել անհատական պաշտպանության անհրաժեշտ միջոցներով, համապատասխան սարքավորումներով և նյութերով: Վանաձորի ԳՇՄ-ի վթարային խումբը իրականացրել է վթարի վերացման աշխատանքները՝ համաձայն վթարների վերացմանն ուղղված միջոցառումների ծրագրի, անվտանգության տեխնիկայի բոլոր պահանջների պահպանմամբ:

Վարժանքին մասնակցել են նաև ՀՀ ներքին գործերի նախարարության ոստիկանության պարեկային ծառայությունը և փրկարար ծառայության հրշեջ-փրկարարական մարզային վարչությունը։

Վարժանքի ավարտից հետո Վանաձորի ԳՇՄ-ում տեղի է ունեցել խորհրդակցություն, որի ընթացքում քննարկվել են վարժանքների կազմակերպման և անցկացման հետ կապված հարցեր, ամփոփվել դրանց արդյունքները, տրվել է գնահատական կատարված աշխատանքին:

Հասարակայնության և զանգվածային լրատվության միջոցների հետ կապերի ծառայություն

Կոնտակտային տվյալներ ԶԼՄ-ների համար՝

(+374 10) 29-47-60

(+374 10) 29-49-36

press@gazpromarmenia.am