ՀՀ և ՌԴ կառավարությունների միջև ստորագրվել է «Գազպրոմ Արմենիա» ՓԲԸ «Ուսումնա-սպորտային համալիր» հիմնարկի գործունեության իրականացման պայմանների մասին համաձայնագիր
ՀՀ փոխվարչապետ Մհեր Գրիգորյանի և ՌԴ փոխվարչապետ Ալեքսեյ Օվերչուկի համանախագահությամբ Մոսկվայում կայացել է Հայաստանի Հանրապետության և Ռուսաստանի Դաշնության միջև տնտեսական համագործակցության միջկառավարական հանձնաժողովի 23-րդ նիստը:Նիստի շրջանակում ՀՀ և ՌԴ կառավարությունների միջև ստորագրվել է «Գազպրոմ Արմենիա» ՓԲԸ «Ուսումնա-սպորտային համալիր» հիմնարկի գործունեության իրականացման պայմանների մասին համաձայնագիր։
Ըստ համաձայնագրի, «Ուսումնա-սպորտային համալիր» հիմնարկն իրականացնելու է կրթական գործունեություն տարրական ընդհանուր, հիմնական ընդհանուր և միջնակարգ ընդհանուր կրթական ծրագրերով Հայաստանի Հանրապետության պետական կրթական չափորոշիչներին համապատասխան՝ հայերեն լեզվով ռուսաց լեզվի պարտադիր դասավանդմամբ։
«Ուսումնա-սպորտային համալիր» հիմնարկը նաև իրականացնելու է կրթական գործունեություն տարրական ընդհանուր, հիմնական ընդհանուր և միջնակարգ ընդհանուր կրթական ծրագրերով Ռուսաստանի Դաշնության դաշնային պետական կրթական չափորոշիչների և համապատասխան դաշնային հիմնական հանրակրթական ծրագրերի համաձայն՝ ռուսերեն լեզվով հայոց լեզվի պարտադիր դասավանդմամբ։
Հիմնարկի կրթական գործունեության հավաստագրումն իրականացվելու է Հայաստանի Հանրապետության օրենսդրության, կրթական գործունեության հավատարմագրումը՝ Ռուսաստանի Դաշնության օրենսդրության համապատասխան։
Համաձայնագիրը հնարավորություն կստեղծի ռուսաստանյան չափորոշիչներով կրթություն ստանալ Ուսումնա-սպորտային համալիրում, որի կազմում գործում է 700 աշակերտի համար նախատեսված դպրոց։
Հասարակայնության և զանգվածային լրատվության միջոցների հետ կապերի ծառայություն
Կոնտակտային տվյալներ ԶԼՄ-ների համար՝
(+374 10) 29-47-60
(+374 10) 29-49-36
Մեծացված լուսանկար (JPG, 128 ԿԲ)