Բնական գազից օգտվելու հնարավորություն է ընձեռված 236 438 տնտեսության

Երեւանում դեռեւս 2002 թվականից գազաֆիկացմանն ուղղված ինտենսիվ աշխատանքների արդյունքում այսօր արդեն բնական գազից օգտվելու հնարավորություն է տրված 236 438 տնտեսության, որոնցից 201 673-ն արդեն գազի փաստացի բաժանորդ են։ Այս թիվը գերազանցում է ԽՍՀՄ տարիների ցուցանիշը, երբ Երեւանում բնական գազի բաժանորդ էր 201 395 տնտեսություն։ Երեկ հրավիրած ասուլիսում «ՀայՌուսգազարդ» ՓԲԸ «Երեւան գազ» մասնաճյուղի տնօրեն Վարդան Հարությունյանը, ներկայացնելով նախորդ տարիներին իրականացված աշխատանքների արդյունքը, նշեց, որ 2002-ից Երեւանում գազաֆիկացման աշխատանքների իրականացմանը «ՀայՌուսգազարդ»-ը ներդրել է շուրջ 7,5 մլրդ դրամ, այդ թվում՝ 506, 9 մլն-ը՝ 2007 թ.։ Այս տարի նախատեսվում է ներդնել եւս 135 մլն դրամ։ Երեւանում գազաբաշխման համակարգի գործող վթարային գազատարների վերատեղադրման եւ հիմնանորոգման աշխատանքների կատարման նպատակով «ՀայՌուսգազարդ» ՓԲԸ 2008–2012 թթ. ներդրումային ծրագրով նախատեսված է իրականացնել 5 մլրդ 840,5 մլն դրամի ներդրում, որից 118,8 մլն՝ այս տարի։ Տասնվեց հարկանի շենքերի գազաֆիկացման աշխատանքներն իրականացնելու համար արդեն ձեւավորվել է աշխատանքային խումբ։ Մոտ ապագայում այդ խնդրին նույնպես լուծում կտրվի։