«Գազպրոմ Արմենիա»-ի ֆուտբոլիստները հաղթեցին լրագրողների ֆուտբոլի հավաքականին 6:2 հաշվով

20 հունիսի 2016, 11:55

Հունիսի 18-ին «Գազպրոմ Արմենիա» ՓԲԸ ֆուտբոլային թիմը անցկացրել է ընկերական հանդիպում լրագրողների ֆուտբոլի հավաքականի հետ: Խաղն անցել է 1/8 ձևաչափով, թիմերը խաղացել են երկու խաղակես՝ յուրաքանչյուրը 35 րոպե տևողությամբ:

Հանդիպումն ավարտվել է 6:2 հաշվով՝ հօգուտ «Գազպրոմ Արմենիա»-ի թիմի: Խաղի 17-րդ րոպեին հաշիվը բացել էր «Գազպրոմ Արմենիա»-ի ֆինանսական բաժնի պետի տեղակալ, հարձակվող Սպարտակ Արզումանյանը, որը հետագայում դարձել էր ևս երկու գոլի հեղինակ: Մրցակցի դարպասը երկու անգամ գրավել էր նաև կիսապաշտպան Հավհաննես Մամբրեյանը (Երևանի ԳԳՄ): Վեցերորդ գոլի հեղինակը՝ հարձակվող Ռոբերտ Հակոբյանն էր (Երևանի ԳԳՄ):

ԶԼՄ-ների ներկայացուցիչների շրջանում առանձնացել են ֆուտբոլային մեկնաբան Էդուարդ Քալանթարյանը («Արմենիա» հեոուստաընկերություն) և «Մեդիամաքս» գործակալության գլխավոր խմբագիր Դավիթ Ալավերդյանը: Երկու ֆուտբոլիստներն անվրեպ իրացրել էին 11-մետրանոց հարվածները:

Թիմերը ցուցադրեցին իսկապես փայլուն և ակտիվ խաղ չնայած հորդառատ անձրևին, որն անդադար տեղում էր երկրորդ խաղակեսի ողջ ընթացքում:

Խաղի ավարտից հետո թիմերը պայմանավորվածություն ձեռք բերեցին նման հանդիպումները դարձնել ավանդական, իսկ աշնանը ևս մեկ խաղ կազմակերպել Արցախում։

«Գազպրոմ Արմենիա» ՓԲԸ թիմի մարզիչ Գևորգ Պապյանի խոսքով, լրագրողների հավաքականի հետ հանդիպումով «Գազպրոմ Արմենիա»-ի ֆուտբոլիստները սկսեցին նախապատրաստվել «Գազպրոմ» ՀԲԸ հաջորդ սպարտակիադային:

2016 թվականի փետրվարին «Գազպրոմ Արմենիա»-ի ֆուտբոլային թիմն առաջին անգամ մասնակցեց Ուֆա քաղաքում (ՌԴ) անցկացված «Գազպրոմ» ՀԲԸ—ի 11-րդ ձմեռային սպարտակիադային: