Գիտատեխնիկական քաղաքականության հարցերով խումբը քննարկել է Գիտության և տեխնոլոգիաների տարվա շրջանակում անցկացվելիք միջոցառումների ծրագիրը
«Գազպրոմ Արմենիա» ՓԲԸ-ում տեղի է ունեցել գիտատեխնիկական քաղաքականության հարցերով աշխատանքային խմբի խորհրդակցությունը, որի ընթացքում քննարկվել են «Գազպրոմ» ՀԲԸ-ում հայտարարված՝ Գիտության և տեխնոլոգիաների տարվա շրջանակում միջոցառումների կազմակերպմանն ու անցկացմանն առնչվող հարցեր:
«Գազպրոմ Արմենիա» ՓԲԸ Գլխավոր տնօրենի տեղակալ — Գլխավոր ճարտարագետ Աշոտ Հակոբյանին ներկայացվել է 2021թ. միջոցառումների ծրագիրը, որով նախատեսված է անցկացնել կլոր սեղանների շարք Ընկերության երիտասարդ և հեռանկարային մասնագետների ներգրավմամբ, ինչպես նաև կազմակերպել բաց դասեր ու դասընթացներ պրոֆիլային բուհերի ավագ կուրսերի ուսանողների, միջին մասնագիտական ուսումնական հաստատությունների և ավագ դպրոցի սաների համար:
Ինչպես նշեց Ա.Հակոբյանը՝ ընդհանուր առմամբ կադրային ռեզերվի ձևավորումը Ընկերության համար օրակարգային հարց է: «Այդ առումով անհրաժեշտ է շարունակել ստեղծել հնարավորություններ մեր հեռանկարային մասնագետների մասնագիտական ներուժի բացահայտման ուղղությամբ, կազամակերպել նորարարության, ինժեներական լուծումների թեմաներով սեմինարներ, լսել մասնագետների գաղափարները, որոնք հետագայում կարող են կիրառվել գործնականում», — ասաց «Գազպրոմ Արմենիա» ՓԲԸ Գլխավոր տնօրենի տեղակալ — Գլխավոր ճարտարագետը:
Ա.Հակոբյանի խոսքով, այդ տեսանկյունից կարևոր բաղադրիչներից է համապատասխան բուհերի հետ համագործակցության հաստատումը և ակտիվացումը, ինչը հնարավորություն կստեղծի լավագույն ուսանողներին բացահայտելու համար, որոնք հետագայում կարող են համալրել Ընկերության ինժեներատեխնիկական անձնակազմը:
«Աշխատանքային խումբը պետք է ուշադրություն դարձնի նաև գազի ոլորտի բանվորական մասնագիտությունների նկատմամբ հետաքրքրության բարձրացմանը, մասնավորապես՝ միջին մասնագիտական ուսումնական հաստատությունների սաների շրջանում: Անհրաժեշտ է դիտարկել մասնագիտացված դասընթացների անցկացման հնարավորությունը՝ ինչպես „Գազպրոմ Արմենիա“ ՓԲԸ „Ինժեներական կենտրոն“ մասնաճյուղի Ուսումնատեխնիկական կենտրոնում, այնպես էլ համապատասխան ուսումնական հաստատություններում», — նշեց «Գազպրոմ Արմենիա» ՓԲԸ Գլխավոր տնօրենի տեղակալ — Գլխավոր ճարտարագետը:
Ըստ Ա.Հակոբյանի՝ հեռանկարային առումով կարող են արդյունավետ լինել նաև ավագ դպրոցի սաների մասնագիտական կողմնորոշմանն ուղղված տարբեր միջոցառումները:
Խորհրդակցության արդյունքներով գիտատեխնիկական քաղաքականության հարցերով աշխատանքային խմբի անդամներին տրվել են մի շարք հանձնարարականներ, հաստատվել է Գիտության և տեխնոլոգիաների տարվա շրջանակում միջոցառումների անցկացման ժամանակացույցը:
Հասարակայնության և զանգվածային լրատվության միջոցների հետ կապերի ծառայություն
Կոնտակտային տվյալներ ԶԼՄ-ների համար՝
(+374 10) 29-47-60
(+374 10) 29-49-36
Մեծացված լուսանկար (JPG, 902 ԿԲ)