«Գազպրոմ Արմենիա» ՓԲԸ-ի ընթացիկ տարվա արտադրական ծրագրերի շրջանակում աշխատանքներն իրականացվում են ըստ ժամանակացույցի

11 օգոստոսի 2022, 10:54Հայաստանի Հանրապետության հանրային ծառայությունները կարգավորող հանձնաժողովի հետ համաձայնեցված՝ «Գազպրոմ Արմենիա» ՓԲԸ-ի 2022թ. արտադրական ծրագրերի շրջանակում շարունակվում են համալիր աշխատանքները գազափոխադրման և գազաբաշխման համակարգի օբյեկտներում։

Ներկայում իրականացվում են Երևան-Արմավիր 500 մմ տրամագծով մայրուղային գազատարի, Ղազախ-Երևան 500 մմ տրամագծով մայրուղային գազատարի, Ղազախ-Երևան II գծի 1000 մմ և 700 մմ տրամագծերով մայրուղային գազատարների ու Գորիս-Նախիջևան 700 մմ տրամագծով մայրուղային գազատարի կապիտալ նորոգման աշխատանքները: Մայրուղային գազատարների նորոգվող հատվածների ընդհանուր երկարությունը կազմում է ավելի քան 38 կմ:

Ընթացքի մեջ են լայնածավալ աշխատանքները նաև գազափոխադրման համակարգի այլ օբյեկտներում, մասնավորապես՝ իրականացվում է «Ալավերդի», «Գետաշեն» և «Արզնի» գազաբաշխիչ կայանների, ինչպես նաև Աբովյանի ԳՍՊԿ-ի ենթակառուցվածքի և տեխնոլոգիական հանգույցների կապիտալ նորոգում։

Շարունակվում են համալիր միջոցառումները գազաբաշխման համակարգի օբյեկտներում, այդ թվում՝ շուրջ 65 կմ միջին և ցածր ճնշման ստորգետնյա գազատարների և թվով 90 հատ պահարանային գազի կարգավորիչ կետերի կապիտալ նորոգման աշխատանքները Երևան քաղաքում, Շիրակի, Լոռու, Կոտայքի, Արմավիրի, Արարատի, Գեղարքունիքի և Սյունիքի մարզերի բնակավայրերում։

2022թ. արտադրական ծրագրերի շրջանակներում բոլոր աշխատանքները ընթանում են ըստ ժամանակացույցի և կավարտվեն մինչև տարեվերջ ամբողջ ծավալով։

Միաժամանակ՝ սպառողների անխափան և հուսալի գազամատակարարման ապահովմանն ուղղված միջոցառումների, 2022–2023թթ․ ձմեռային ժամանակահատվածին նախապատրաստման շրջանակում «Գազպրոմ Արմենիա» ՓԲԸ-ի գազամատակարարման և գազաֆիկացման մասնաճյուղերի և «Տրանսգազ» ՍՊԸ կողմից գազափոխադրման և գազաբաշխման համակարգի օբյեկտներում ներկայում իրականացվում են պլանային պրոֆիլակտիկ և ընթացիկ նորոգման աշխատանքներ: