Ընթացիկ տարում գազափոխադրման և գազաբաշխման համակարգի օբյեկտներում նախատեսված են համալիր աշխատանքներ հանրապետության ամբողջ տարածքում

5 ապրիլի 2022, 11:47Հայաստանի Հանրապետության հանրային ծառայությունները կարգավորող հանձնաժողովի հետ համաձայնեցված՝ «Գազպրոմ Արմենիա» ՓԲԸ 2022–2026 թթ. ներդրումային ծրագրի (այդ թվում՝ կապիտալ նորոգման պլանի) շրջանակներում գազափոխադրման և գազաբաշխման համակարգի օբյեկտներում իրականացվում են համալիր աշխատանքներ հանրապետության ամբողջ տարածքում։

Հնգամյա ժամանակահատվածի համար կապիտալ ներդրումների ընդհանուր ծավալը նախատեսված է 140 501,6 մլն դրամի չափով (առանց ԱԱՀ)՝ հետևյալ հիմնական ուղղություններով.

— Աբովյանի ԳՍՊԿ-ի ընդլայմանը, վերականգնմանը և վերակառուցմանն ուղղված ներդրումներ,

— գազափոխադրման և գազաբաշխման համակարգի օբյեկտների ընդլայմանը, վերականգնմանը և վերակառուցմանն ուղղված ներդրումներ,

— նոր բաժանորդների միացմանն ուղղված ներդրումներ։

Ընթացիկ տարում կապիտալ նորոգման պլանով, մասնավորապես, նախատեսված են Երևան-Արմավիր 500 մմ տրամագծով մայրուղային գազատարի, Ղազախ-Երևան 500 մմ տրամագծով մայրուղային գազատարի, Ղազախ-Երևան II գծի 1000 մմ և 700 մմ տրամագծերով մայրուղային գազատարների ու Գորիս-Նախիջևան 700 մմ տրամագծով մայրուղային գազատարի կապիտալ նորոգման (մեկուսիչ շերտի փոխարինմամբ) աշխատանքներ: Մայրուղային գազատարների նորոգվող հատվածների ընդհանուր երկարությունը կազմում է շուրջ 40 կմ:

Լայնածավալ աշխատանքներ են իրականացվելու նաև գազափոխադրման համակարգի այլ օբյեկտներում, նախատեսված է «Ալավերդի», «Գետաշեն» և «Արզնի» գազաբաշխիչ կայանների, ինչպես նաև Աբովյանի ԳՍՊԿ-ի ենթակառուցվածքի և տեխնոլոգիական հանգույցների կապիտալ նորոգում։